首先講一講懲教返工的更，佢哋有4更

A:06:30-13:30

P:13:30-20:30

N1:18:30-01:30

N2:01:30-08:30

返工一定係一pairpair更期，例如返完P更，第日一定係返A更;而返完N2，第二日就返N1，除非同人調，否則係定律，啲更期通常兩星期咁出，好多時今個星期都唔知下星期要返乜。每星期返6日，每日7小時，dayoff都係pair住放，所以每隔兩星期先會放1次，但1次就放2日;返工期間無食飯時間，要等到放工先有得食,佢個環頭仲刻薄到staff雪櫃都無，帶唔到飯，要日日食canteen碟頭飯;仲有，因為保安理由，返工期間係絕對不可帶電話。

       

佢返工個環頭好偏辟，我們無養車，坐公共運輸工具都要預2個鐘1程，所以追更佢就會瞓宿舍。返P更+A更就瞓一晚，如果更期係N2-N1-P-A就會連續3晚都唔返屋企;仲有啲standby更，仲耐係5晚唔返屋企瞓。

       

同老公結咗婚一年，拍拖果陣都知佢要返shift會成日瞓宿舍，但係結咗婚成立咗家庭先感覺到好大問題，有咩事根本就無可能搵到佢解決。佢嘅生命好似得返返工咁，計一計其實我每星期最多都係見4日，已經係好奢侈!

佢其實好好，無不良嗜好，平時興趣係做運動。但係份工好似陪坐牢無自由，無家庭，做佢屋企人我感到好孤單。佢本身無乜學歷，花咗咁多青春，但依個CV出到社會係等於nothing,三十幾歲人搵過第二份工，就連果2xk都無埋，咁樣燃燒青春個人認為真係好唔值得，但係佢一啲都唔認為。其實我都係返shift,但家庭的責任就好似好理所當然地放哂喺我度，屋企有嘢壞又係我搞，寵物唔舒服又係我，家務就佢返嚟就會幫手做，但平時都係我!

       

我們plan生B,但佢好日唔係屋企都好難。就算生咗B又係驚，佢繼續係咁對家庭無貢獻，到時我只會更辛苦，更無可奈何!做窮中就3產，靠佢一份人工無可能生活到，如果我要做全職媽媽，屋企嘢都只有我處理，真係人都癲。

但問心又唔怪得佢，佢去返工又唔係去嫖賭飲吹，都係為咗賺錢返屋企啫!

奉勸大家，想入行懲教/想搵個懲教男友的諗清楚啲呀!!!!